61 lagunek euren testigantza eman dute Alhamako herriaren ohiturak, lanbideak eta historia babesteko.
Corellako Udalak, Labrit Ondarearekin batera, herriaren ahozko ondarea bildu eta zaintzeko lana egin du 2020an. 61 bizilagunek beren testigantza eman dute Erriberako herri honetako XX. mendeko erretratua egiteko.
Historian aldaketa gehien bizi izan dituen belaunaldietako batek bere bizipenak gogoratu eta eskaini ditu, imaginario kolektiboaren parte izan diren horiek, eta, horrela, Erriberako herriko ohiturak, tokiko hiztegia, jaiak edo intrahistoria babestu ditu.
Resurrección Sesmak gogoan ditu etxean egindako erremedio batzuk. “katarrorako, ardo egosia edo kataplasmak hartzen genituen. Erredurak sendatzeko patata bat moztu eta erretako eremutik pasatzen genuen”. Villar Garcíak gaineratu duenez “tripako mina sendatzeko pepinilloak anisean ematen zizkiguten” eta ez du Chicarro, sendatzailea, ahazten.
Miguel Angel Pastorrek gogora ekartzen du “Corellan aduana bat zegoela Gaztelako transhumantziatik ardi-artilearekin zetorren jendearen zergak kobratzeko”. Herrian egiten ziren lanbide ugariek ere badute isla lan honetan: «Hemen hainbat lanbide zeuden, hala nola ferratzailea, albaitaria, hornizainak, sokazainak, gurdizainak, zorroztaileak, eztainuzaleak, latorrigileak, zapatariak, jostunak, traperrak eta ardoa gordetzeko upelak egiten zituzten tailer bat», Domingo Jimenezen hitzetan.
Daria Uhartek gogoratzen du bere ama “egilea” zela, hau da, beste emakume batzuk bilatzen zituen landan lan egiteko, dena sasoiaren eta uztaren araberakoa zen. Gero berak banatzen zuen dirua jornaleren artean. Gizonek beste eginkizun batzuk egiten zituzten landan, mahastian “esforrozinatu” egiten zuten eta belarra kentzen zuten aitzurrarekin.
3.000 oroitzapen baino gehiago.
Guztira, Labrit Ondareak 61 elkarrizketa egin ditu, 117 grabazio-ordu, 3.299 pasarte edo zatiz osatuak. Oroigarri horiek artxibatu, aztertu eta babestu egin dira, Nafarroako bostehun bat herritan egindako 2.500 elkarrizketa baino gehiagorekin batera. Horiek guztiak “Navarchivo” eta gure memoria kolektiboaren parte dira.
