Mallorcako Irla kontseiluko Kultura, Ondare eta Hizkuntza Politika Sailak lizitatuta, Ondare Immaterialaren eremuan orain arte Espainiako Estatu osoan aurrekontuko diru-hornidura handiena duen proiektua da. Labriteko arduradunak uhartera joan dira aste honetan inbentarioa martxan jartzeko eta, besteak beste, irlako Ondare Zuzendari Francisca Coll Borràsekin bildu dira.
Proiektuaren aurrekontua 248.288 € (+ BEZ) da eta 24 hilabeteko iraupena izango du, 2023ko urtarrilaren 1ean hasita, eta beste 24 hilabetez luza daiteke, 2025era arte. Kontseiluak ezarritako baldintzen arabera, denbora horretan zehar lana zonifikazio honen arabera egingo da: 2023an, Llevant eta Palma eremuak; 2024an, Ponent eta Nord; 2025ean, Nord-est eta Pla-centre; 2026an, Migjorn eta Pla-ponent. Horrela, kontratua amaitzean 600 manifestazio inbentariatuko dira guztira, uhartea osatzen duten udalerri/auzune bakoitzeko 10.
Inbentarioa egin aurretik, IPCIMen parte izan daitezkeen adierazpen ez-materialak identifikatzeko aurreinbentarioa egingo da. Horretarako, Consellaren laguntza izango da. Inbentariatu beharreko adierazpenak zehaztu ondoren, informazio-iturri nagusiak identifikatuko dira eta adierazpen bakoitzaren espazio- eta denbora-eremu zehatzak ziurtatuko dira, lan-kronograma zehatza egin ahal izateko. Landa-lanean, komunitate eramaileen lankidetza bilatuko da, eta dokumentazio grafikoa eta ikus-entzunezkoa bilduko dira. Iturri desberdinetatik bildutako informazio guztiarekin, kabineteko eta landa-laneko lanak txandakatuz, kultur adierazpenen fitxak idatziko dira, Institut Ramón Muntaner (IRMU) erakundearen ereduari jarraituz. Fitxak idatzi ondorengo hurrengo urratsa IPCIMen datu-basean sartzea eta gauzatze-memoriak egitea izango da. Memoria bat proiektuaren fase bakoitzarekin eta beste bat, orokorra, hura amaitu ondoren.
Proiektu honetara bideratutako lantaldea zortzi pertsonez osatzen da gaur egun, zuzendaritza/koordinazio lanak eta landa-lanak uztartuz. Diziplina anitzeko taldea da, eta eskarmentu handia du Ondare Immaterialaren aurreinbentarioak eta inbentarioak egiten. Etnografiako, antropologiako, proiektuen kudeaketako eta ikus-entzunezko sektoreko profesionalak barne biltzen ditu.
Gaikuntza-ikastaroa Kuban
Labritek, bestalde, formakuntza-ikastaro bat eman berri du Habanan (Kuba), San Geronimo Unibertsitate Ikastetxean, Habanako Historialariaren Bulegoak Kultur Ondare Immaterialaren ahozko memoria eta inbentarioa biltzeko metodologietan interesa duten ikasle eta profesionalei eskainia. Ezagutza metodologikoen transferentzia Tecnalia Fundazioak Karibeko uhartean garatzen duen lankidetza-proiektuetako batean kokatu da.
Enpresa iruindarra azaroaren 10etik 18ra egon zen Kubako hirian 16 kredituko ikastaro hori ematen, eta Gizateriaren Ondare diren Hirien Nazioarteko Topaketan ere parte hartu zuen, Industria Ondarearen dimentsio immaterialari buruzko hitzaldi batekin.
Labrit 2017an hasi zen nazioarteko jardueran, Ekonomia Ministerioaren ICEXen eta Nafarroako Nazioartekotze Planaren (PIN) laguntzen enpresa esleipendunetako bat izan ondoren.
