Solastatzen, Jurramendiko hegoaldean oroitzapenen bidez plazer eta aisialdia partekatzen, iraganetik etorkizunera leku eta pertsonen arteko loturak marraztuz. Horrela sortu dugu belaunaldien arteko eta herrien arteko ezagutza trukatzeko eta transmititzeko proiektu hau. Gai eta garai desberdinetako argazkietatik eta horien interpretaziotik abiatuta, gure nortasunari eta gure bizimoduen bilakaerari buruzko istorioak eta pasadizoak bildu ditugu, babestu beharreko ondare immateriala.
Webgune honetan, protagonistek interpretatutako argazki zaharrak eta egungoak aurkituko dituzu. Argazki horiek guztiak Aberin, Muniain, Arellano eta Morentingo bizilagunen artean bildu dira, modu parte-hartzailean. Batzuetan ikusi ahal izango da, bi argazkien artean hamarkadak igaro diren arren, batak eta besteak irudikatzen duten lekuak edo gertaerak herriarentzat eta bertako jendearentzat esanahi berezia izaten jarraitzen duela. Sortu dugun material hau gaur egungo eta etorkizuneko gozamenerako geratzen da.
Eta hau hasiera besterik ez da. Kontatutako istorioei esker, udan zehar gure lau herrietan taularatuko dugun antzezlana sortu ahal izango dugu. Gure plazer eta aisialdirako, Solanan oroitzapenak partekatzen jarraitzeko.
Nafarroako Gobernuak, Vianako Printzea Erakundeko Kultura Zuzendaritza Nagusiaren bitartez, 724.650 euroko laguntzen deialdia ebatzi du, Next Generation EB funtsen babesean, Berreskurapen, Eraldaketa eta Erresilientzia Planaren esparruan, Nafarroako hiri-eremuetatik kanpoko kultura-eskaintza zabaldu eta dibertsifikatzeko proiektuetarako.
Ikusi proiektuaren webgunean hemen: solazandonos.com
